Mkuu wa Mkoa wa Dar es Salaam  Mhe. Albert Chalamila ametoa pongezi kwa Mkurugenzi Mkuu wa Mamlaka ya  Usimamizi wa Bandari Tanzania (TPA) Bw. Plasduce Mbossa na Meneja wa Bandari ya Tanga Bw. Masoud Mrisha  kwa utendaji kazi wao uliotukuka hali iliyopelekea kuongezeka kwa ufanisi katika Bandari ya Tanga.

Mhe. Chalamila alitoa pongezi hizo wakati alipotembelea banda la Bandari ya Tanga kwenye Maonesho ya NaneNane Kanda ya Mashariki 2025, yanayofanyika katika Uwanja wa Mwalimu JK Nyerere Mkoani Morogoro.

Akizungumza mara baada ya kupokea taarifa ya utendaji kazi wa bandari hiyo Mhe. Chalamila alisema kuwa, kuongezeka kwa ufanisi katika Bandari ya Tanga ni pamoja na usimamizi mzuri wa Mkurugenzi Mkuu  wa (TPA) pamoja na Meneja wa Bandari hiyo.

Mhe. Chalamila aliongeza kuwa, kuongezeka kwa ufanisi katika bandari hiyo umerahisisha usafirishaji wa shehena ya mazao ya kilimo kutoka  Mikoa ya Kanda ya Kaskazini na nchi jirani jambo ambalo ni sifa kwa nchi yetu”.

Aidha Mhe. Chalamila alitoa rai kwa wafanyabiashara nchini kuitumia bandari hiyo kusafirisha mizigo yako kwani usafirishaji kwa njia ya maji hauna mzunguko  mrefu na ni salama pia.

Kwa upande wake Afisa Masoko wa Bandari ya Tanga Bw. Ridhiwani Mwasanyagi alimhakikishia Mkuu wa Mkoa huyo bandari ya tanga itaendelea kufanyakazi kwa ufanisi ili kuunga mkono juhudi za Serikali katika kuwezesha biashara kufanyika kwa ufanisi.

Bandari ya Tanga imekuwa ikisafirisha shehena mbalimbali za mazao ya kilimo  kwa uchache kama  Mkonge Chai , Kahawa, Macademia hivyo ushiriki wa Bandari ya Tanga kwenye Maonesho ya Nanenane Kanda ya Mashariki  2025, ni kutoa elimu kwa umma na wafanyabiashara wa mazo ya kilimo.

Mkuu wa Mkoa wa Mtwara Mhe. Kanali Patrick Kenan Sawalla, tarehe 6 Agosti 2025, ametembelea banda la Bandari ya Mtwara katika maonesho ya 12 ya Wakulima, Wafugaji na Wavuvi (Nanenane) yanayoendelea katika viwanja vya Ngongo vilivyopo Mkoani Lindi.

Mhe. Sawalla amevutiwa na utaratibu unaotumika kutoa elimu ya masuala ya Bandari kwa wadau mbalimbali wanaotembelea banda hilo. Vilevile, amesisitiza kuendelea kujiweka tayari katika kuhudumia shehena ya korosho katika msimu wa mwaka 2025/26.

Mamlaka ya Usimamizi wa Bandari Namibia (NAMPORT) ambao upo Nchini kwa ziara ya mafunzo ya siku mbili, ukiwa na lengo la kujifunza kuhusu  Shughuli za utekelezaji Bandarini na utendaji wa kimajukumu wa TPA. 

Ujumbe huo wa Maafisa 13 kutoka NAMPORT, umeongozwa na Afisa Rasilimali Watu Mkuu Bi. Johana Hatutale na umepokelewa na Mkurugenzi wa Masoko na Uhusiano wa TPA Dkt. George Fasha kwa niaba ya Mkurugenzi Mkuu Bw. Plasduce Mbossa.

Maafisa hao pia wamepata fursa ya kujifunza kuhusu usimamizi wa rasilimali watu, uboreshaji wa miundombinu ya Bandari na mbinu bora za utoaji huduma kwa wateja na pia utatembelea Chuo cha Bandari (Bandari College) kwa ajili ya kuona namna Tanzania inavyowekeza katika maendeleo ya rasilimali watu kwa ajili ya sekta ya bandari.

Ziara hii ni sehemu ya ushirikiano wa kimataifa wa TPA katika kubadilishana uzoefu, kukuza ufanisi na kuendeleza diplomasia ya bandari Barani Afrika.

Waziri Mkuu Mstaafu Mhe. Mizengo Kayanza Pinda amewaasa wafanyabiashara wa mazao ya kilimo nchini kutumia Bandari ya Tanga kusafirsha mazao yao kwenda kwenye Soko la Kimataifa.

Mhe. Pinda aliyasema hayo alipokuwa mgeni rasmi katika ufunguzi wa Maonesho ya Nanenane Kanda ya Mashariki 2025, yanayojumuisha Mikoa minne ya Tanga, Dar es Salama, Pwani na Morogoro yanayofanyika katika Uwanja wa Mwalimu Julius Kambarage Nyerere  maarufu kama “Viwanja vya NaneNane”.

“Bandari ya Tanga inatupa heshima sana  katika nchi yetu  hivyo natoa  rai kwa  wafanyabiashara  wa mazao ya kilimo nchini kutumia Bandari hiyo ambayo imeboresha huduma zake” aliongeza Mhe Pinda.

Aidha  Mhe. Pinda alitoa wito kwa Shirika la Reli la Tanzania (TRC ) na Bandari ya Tanga kuendelea kushirikiana ili kupanua wigo katika utoaji wa huduma katika sekta ya usafirishaji kanda ya mashariki.

Maonesho ya NaneNane Kanda ya Mashariki, kwa mwaka 2025 yanashirikisha Taasisi za umma na binafsi na Bandari ya Tanga ni mshiriki wa maonesho hayo ambayo yenye kauli mbiu ya  “Chagua Viongozi  Bora kwa Maendeleo Endelevu ya Kilimo, Mifugo na Uvuvi 2025”.